سنه. . . منه. . .
سنه سئویلمه گی منه سئومه گی
سنه گوزل گوزله قاش وئریب فلک
سنین گوزلرینه اوچو اولماغی
منیم گوزلریمه یاش وئریب فلک
وئردی سنه قارا فیتنه تئللری
سئویملی گوزلری، شیرین دیللری
منیم اوره ییمه سئوگی گوللری
سنه ده اوره یی داش وئریب فلک
محبت ائیله دی تالان عومرومو
افسانه تک ائتدی یالان عومرومو
حسرته باغلادی قالان عومرومو
منه بیر بلالی باش وئریب فلک
آذراوغلو
داریخدیم
یامان قریبسه دیم بو آخشام چاغی
گوزلرین یادیما دوشدو داریخدیم
آیریلیغین اوو تک منی اوخلادی
اوخو دئشدی اوره ییمی داریخدیم
دوشوبدو یادیما سئوگینین یازی
آخدی گوزلریمین جوشغون آرازی
کوکله ندی یئنه ده سینه مین سازی
تئللرینه نغمه قوشدو داریخدیم
حسرتلی بیر عومور سورورم ایندی
حسرتین ساچینی هورورم ایندی
ساچیمدا دن لری گورورم ایندی
جاوانلیقین قوشو اوچدو داریخدیم