مجنونلوق
نئچه مدتدی کی کونلوم سنه چوخ مایل اولوب
آرامیزدا ولی هیجران نئجه گؤر حایل اولوب
نئچه ایل لردی کی سنسیز سن اوچون تک یاشادیم
جاوان عؤمروم سنین عشقینده داها زایل اولوب
منلیک اولسئیدی سئوردیم سنی اؤلمه زدیم هه له
نه دئییم کی منه هیجران قمی عزراییل اولوب
سئوگی دونیاسینا بیر گون شاهیدیم سن مَلَکَم
سنسیز آنجاق بو شاهین گؤر نئجه بیر سایل اولوب
لال اولان طبعیمه هیجران دی کی فرمانی وئریر
آیریلیق دردینی اظهار ائلییه م ،قایل اولوب
منی ایللر یاشادیب دیر سنین عشقین گؤزه لیم
آذرین عشقیده مجنونلوغا دای نایل اولوب
شیردل(آذر)
کؤنلوم. . .
کؤنلوم آغاج اوسته سارالان یارپاغا بنزه ر
دردیم گونو گوندن دیکه لیب بیر داغا بنزه ر
کؤنلوم ائله قاندی ،قاراقانچیردی غمیندن!!
داش آلتدا ازیلمیش،قارالان دیرناغا بنزه ر
ایللر بویو سینه م ده بئجرتدیم سنین عشقین
آمما گؤرورم ایندیجه بارسیز باغا بنزه ر
سنسیز سینه مین گؤیلرینه قاندی سپیلمیش
بیر قانلی شافاق دیر، کی هر آخشام چاغا بنزه ر
هر گون من اوچون مرثیه دی قم دی حیاتیم
چوخ دان دی بو عاشیق اولوب آنجاق ساغا بنزه ر
سن دن سورا بو عؤمرومو کاش تانری آلئیدی
بو وئردیگی گؤنلرده کی جان آلماغا بنزه ر
بیر قیش یئنی دن گلدی بوکولدو قارا هر یئر
آذر،گئییب«آغ کورکونو» قاردان آغا بنزه ر
شیردل(آذر)
گئتمه
بیر آن ایاق ساخلا گئتمه آ نازلیم
هله وار سئوگیدن کؤز اوره ییمده
هله اوخونمامیش، واراخلانمامیش
قالیبدی بیر کیتاب سؤز اوره ییمده
سینه م ده کسیلیر بیر املیک قوزو
سپیلیر یاراما هیجرانین دوزو
گئدیرسن آخاجاق سئوگی اولدوزو
دالینجا قالاجاق گؤز اوره ییمده
اسه جک بو باغ دا خزان یئللری
سولاجاق سینه م ده آرزی گوللری
هله یازمامیشام سون غزللری
آماندی صبر ائله دؤز اوره ییمده
گئدیرسن سوساجاق آذرین دیلی
بویانار حسرته هر آیی ایلی
بیلیرسن چتیندی سئوگی نیسگیلی
سنی ساخلایاجام اؤز اوره ییم ده
شیردل(آذر)
آ نازلیم
سنسیز یاشاماق سانما کی آسان دی آنازلیم
سنسیز منه دونیا یئکه زیندان دی آنازلیم
(معمار)
سنسیز گئجه لر غصه منه یاردی آنازلیم
سنسیز گونوزوم ده گئجه تک تاردی آنازلیم
سنسیز بو شَهَر ده منه بیر زیندانا بنزه ر
سنسیز نه مغان،دونیا منه داردی آنازلیم★
سنسیز نه باهار باغ،نه گولوستان نه طراوت
بولبول ده گؤزوم ده ائله بیل ساردی آنازلیم
سویله من اوچون سئیر گولوستان نه یه لازیم
هر گول اولا،سنسیز گؤزومه خاردی آنازلیم
بیر گون اولر آذر اینان حسرتله یانارسان
گل قدرینی بیل تا نه قدر واردی آنازلیم
سنسیز منه هئچ کیمسه گولوم یار اولا بیلمز
تکجه منه غمخوار او (معمار)دی آنازلیم
عشق اهلینین عشق اهلی بیلر حالینی البت
عشق اهلینه چون باشقاسی اغیاردی آنازلیم
هیجران ائله بیر درددی کی درمانی اؤزون سن
آذر نئجه هیجرانه گرفتاردی آنازلیم
شیردل(آذر)
چکمه امتحانه منی
سالیبدی زار بیرحاله غم زمانه منی
اییبدی سندن ایراق اوخشادیب کمانه منی
دوزائیدیم آمما زمانه منیله اَیری دولاندی
کَدَر اوخو یئنه ده ائیلئییب نشانه منی
پوزولدو باغ اومیدیم سارالدی آرزی گولوم
زمانه توش ائله دی گؤر نئجه خزانه منی
نه صبر قالدی نه طاقت غم فراقیندن
سالیر بو آیریلیقین گونده مین گومانه منی
فغان فغان اوجالیر حسرتینده آه و امانیم
فغان کی سالدی غمین آه الامانه منی
منم او بولبول شیدا باغی باهاری پوزولموش
سینه م ده شعله چکیر غم سالیر فغانه منی
اجل یئتیش دادیما آل منی بو هیجراندان
آماندی گل کی بو هیجران گتیردی جانه منی
صبا یئتیر او نیگاره منیم تمنامی
دئنن فراقیله دای چکمه امتهانه منی
عباسعلی شیردل(آذر)