نه چشمه دن آز سان جانیم
نه چشمه دن آزسان جانیم نه چای دان
یوخاریسان اولدوزلاردان هم آی دان
داغلاری باغلاری پای ائیله سه لر
محالدیر کی کئچم سنین تک پای دان
محببتین هاچان اسیرسه ؟گولوم
بوزلو قیش اولسادا ،سئچیلمیر یای دان
حوسنونو سایاندا دلیم لال اولور
گوزللیگین آخی کئچیبدی سای دان
واخ بئواخ کونول وای وایدادی سنسیز
باشقا ایشی قالمیر نئیله سین ، وای دان
وصفووه بو تایین شاعیرلریله
گرگ شاعرلر چاغیرام او تای دان
آدیندا اوزون تک نورلو دور ، اوندان
یوخاریسان اولدوزلاردان هم آی دان
استاد صمد پورامان
غزل
{دئمه رغبت سیز اولوب سئومه لی دیلداره غزل
عصر رایانه ده هاردان یاراشار یاره غزل}
عاصم اردبیلی
اومما درمان اولا احوال پریشانه غزل
نئیله سین قلبیده بو درد فراوانه غزل
زهر دوران سؤزوده شعری ده بیمار ائلئییب
چوخلو بیزدن اؤزو محتاجدی درمانه غزل
داها نه شعر و غزل،نه یازی ایامی ده ییل
ائل آراسیندا یاشیر گؤر نه غریبانه غزل
یوخدو جان بیزده کی تقدیم اولا جانانه لره
نه دی پیمان کی وفا ائیلییه پیمانه غزل
هره بیر یانه قاچیر،باشدی باشین ساخلادی دیر
دهر دون ایچره اولوب هاممیا بیگانه غزل
باخ هامی قاچمادادیر تکجه قارین توخلوق اۆچۆن
چؤرگ اولماز بالا! بو عصریده انسانه غزل
پولو یوخ چوخلارینین اگنینه بیر پالتار آلا
اؤرتوگ اولماز مارالیم!قامت عریانه غزل
بو زامان برقدی روشن ائله ین تار گئجه نی
شمع یوخدور یارادا،شهپر پروانه غزل
باغبان پوزدو باغی کؤچ ائله دی شهره ساری
کیم یازار بو پوزولان باغ و گلستانه غزل؟
سوسدو بولبولده،نه واردی سسی،نه وار سراغی
باغچا باغ اولمیاجاق بولبول نالانه،غزل
چوخونون قلبینی دوران دولانیب قان ائله دی
نئیله یر بیر بئله عصره،بئله دورانه غزل
کونولوم مسکن اولوب غملره ،قلبیم اود آلیر
نئیله یر سینه ده کی شعله ی سوزانه غزل
قلمی آل اله دفتر دولوسو غصه یازاخ
درد دوران ائله ییب سینه می غمخانه،غزل
آذرا! بسدی اونود یازماغی،شعری،غزلی
آخر هاردان یاراشار گوشه ی زندانه غزل؟
شیردل(آذراوغلو)
سنی گؤرن زامان...
سنی گؤرَن زامان بیلمیرم ندن
اؤرَییم گؤینَه ییر دیزلریم اسیر
دالغالانیر گؤزلریمدن آخیر یاش
غصّه پیچاق اُولور باغریمی کسیر
سنی گؤرن زامان بیلمیرم ندن
اؤرییمده یامان های هارای دوشور
آرپا چایی آلیب سارانی قاچیر
خان چُوبان آغلاییر بیر آخ وای دوشور
سنی گؤرن زامان سوسقون قالیرام
اوره ییم سینَه مین کؤزونده یانیر
ترپنمیر دُوداقیم دانیشا بیلمم
دُوداقیم دیلیمین سؤزونده یانیر
سنی گؤرن زامان گؤزلریم آغلیر
آخیر گؤزلریمدن قان شلاله لر
هیجقیرتیم ایچیمده هارایلار سالیر
جُوشور اوره ییمده حزین نالَه لر
سنه شیرین دئسم بو عشقین ایچره
فرهادین تِئشَه سی یادیما دوشور
لیلی یَه بنزتسم گولوم من سنی
مجنون پِئشه سی یادیما دوشور
.
.
.
قُوجالمیشام ایندی سِودا یُولوندا
هَلَه دَه چاشارام سنی گؤرنده
ایاق ساخلایاراق سنه باخیرام
رویادا یاشارام سنی گؤرنده
هله ده دورموشام یُوللارین اوسته
یاشادیرام عشقی اؤز اوره ییمده
سُوزاریب قالمیشام شاشقینام هله
سُورغولار اُولوبدی کؤز اوره ییمده
بیر مکتوب
بیر کتاب سؤز یازارام هر گئجه او نازلی یارا
عشقیمه حسرتیمه سئوگیمه اقرار ائدرم
منه سنسیز یاشاییش اولدو عزابداندا بتر
تکجه بو جمله نی هر سطریده تکرار ائدرم
الوداع ائتدین...
الوداع ائتدین،کؤنول آه و فغان ائتمکدَه دیر
باخ کی آه ایله غم هیجری بیان ائتمکده دیر
کئچدی عمرون گونلری حسرتله،گئتدی نئیله ییم
حسرتین،هیجرین ولی قدّی کمان ائتمکده دیر
گیزلَه دیب یار دردینی هئچ شخصه اظهار ائتمَه دیم
آمما گیزلین دردی آغ ساچلار عیان ائتمکده دیر
الوداع ائتدین،ولی علت نَدی هئچ بیلمَه دیم
سن گئدن گوندن اوره ک مینلر گومان ائتمکده دیر
.
.
.
گاه دئدیم گئتمز نیگاریم،عهدینه ائیلر وفا
کؤسمَه ییب مندن،منی یار امتحان ائتمکده دیر
گاه دئدیم یارگئتسه ده،آخر منی یاد ائیلییَر
گر چی بو هیجرانی هر دم،قلبی قان ائتمکده دیر
آمما گونلر آیلار اُولدو،آیلاریم دؤندو ایلَه
گلمدین هئچ،ایندی دَه کؤنلوم فغان ائتمکده دیر
یاز گلیب،چَه چَه وورور گولشنده بولبوللر،گولوم
نوباهاری (آذره)،قهرین خزان ائتمکده دیر
آذراوغلو